Републичкиот центар за поддршка на лица со интелектуална попреченост – ПОРАКА во соработка со здружението „На пола пат“ од Србија и СУМЕРО од Босна и Херцеговина започнаа со спроведување на проект со наслов „Интеркултурно учење за сите“ во јануари 2023 година. Проектот се заснова на долгогодишното искуство на трите партнер организации во областа на социјална инклузија, развој на вештини за лица со интелектуална попреченост во однос на окупациона терапија, креативност, вештини за само-застапување, интеркултурно учење и толеранција.

РЦПЛИП – ПОРАКА во 2023 година ќе продолжи со реализација на активностите кои произлегуваат од поставените цели и принципи на делување. Програмските активности на РЦПЛИП – ПОРАКА се базираат и се во насока на процесот на имплементација на Конвенцијата на ОН за правата на лицата со попреченост, како исклучително значаен документ кој има правно-обврзувачки карактер за државите кои го имаат ратификувано.

Фондот за Западен Балкан (WBF), со поддршка на ЕУ, го поддржа проектот на Здружението „На пола пат“ под името „Интеркултурно учење за сите“, (“Intercultural Learning for All”) кој ќе се реализира во периодот од јануари до септември 2023 година.

Градот Скопје и Центарот за поддршка на лица со интелектуална попреченост – ПОРАКА Скопје на 27.1.2023 година склучија договор за поддршка на двата дневни центри за лица со интелектуална попреченост над 18-годишна возраст кои се наоѓаат во населбите Аеродром и Капиштец, согласно програмата за активностите во областа на социјалната, детската и здравствената заштита.

ЦПЛИП – ПОРАКА Радовиш  со свои активности го одбележа Меѓународниот ден на лицата со попреченост. На 21.11.2022 година во просториите на дневниот центар на РЦПЛИП – ПОРАКА во Радовиш се реализираа две различни креативни работилници со волонтерите од Црвен крст од Радовиш и корисниците на дневниот центар. Првата работилница беше наменета за запознавање со начините на пружање прва помош, а на втората се креираа ракотворби од глина.

Центарот за изведувачки уметности и едукација Театар Пи реализира мултимедијална кампања со наслов „Чудата во Алиса“ во соработка со РЦПЛИП – ПОРАКА и неговите социјални сервисни служби во Скопје.

Во организација на Националното координативно тело за имплементација на Конвенцијата на ОН за правата на лицата со попреченост, Министерството за труд и социјална политика и Националниот Совет на инвалидски организации на Македонија, а во соработка со Германското друштво за меѓународна соработка (ГИЗ) се одржа свечена седница со којашто се одбележа 3 декември, Меѓународниот ден на лицата со попреченост.

Како членка на Форумот за рана интервенција на ЕАСПД, РЦПЛИП – ПОРАКА во текот на 2022 година учествуваше во подготовката на Документот за позиција на ЕАСПД „Интервенција во раното детство насочена кон семејството: Најдобриот почеток во животот“.

РЦПЛИП – ПОРАКА години наназад организира и одржува работилници на кои се разгледуваат и дискутираат изготвените SWOT анализи на локалните организации. SWOT анализата е структуриран метод за планирање на идните стратегии на организацијата, а воедно е мошне корисна и за проценување на актуелната состојба внатре во организацијата, со сите нејзини предности и слаби страни, но и можностите и заканите кои доаѓаат од опкружувањето во кое таа организација делува.

Европската асоцијација на обезбедувачи на сервисни служби за лица со попреченост (ЕАСПД), во изминатиот период, подготви извештај за влијанието на кризата со трошоците за живот врз услугите за поддршка на лицата со попреченост, посветувајќи особено внимание на зголемените трошоци за енергија.

Дневниот центар за лица со умерена и тешка интелектуална попреченост над 18 годишна возраст на РЦПЛИП – ПОРАКА во Радовиш на 2-ри ноември одбележа 20-годишно јубилејно постоење и работа. Во присуство на пријатели и поддржувачи од чинителите на локално ниво, се потсетивме на почетоците и изодениот пат за да се стаса до денешниот современ дневен центар.

Програмските активности во дневните центри на РЦПЛИП – ПОРАКА во Скопје се спроведуваат согласно предвидената програма доследно следејќи ги протоколите за работа во дневните центри за деца/лица со попреченост. Како и секогаш, акцентот на работата во дневните центри се става на усвојување на нови и унапредување на постојните вештини за самостојно живеење кај корисниците.

РЦПЛИП – ПОРАКА и ЦПЛИП – ПОРАКА Радовиш во изминатиот период спроведуваат активности за санација на објектот на дневниот центар на РЦПЛИП – ПОРАКА во Радовиш, со која ќе биде надминат долгогодишниот проблем со влага во просториите на дневниот центар и со што значително ќе се подобрат условите за работа со лицата со интелектуална попреченост во дневниот центар.